Originaltext
DEAllerêrst lebe ich mir werde,
sît mîn sündic ouge siht.
Daz hêre lant und ouch die erde
der man vil der êren giht.
Mirst geschehen des ich ie bat:
ich bin kommen an die stat
dâ got mennischlîchen trat.
Schoeniu lant rîch unde hêre,
swaz ich der noch hân gesehen,
sô bist duz ir aller êre.
Waz ist wunders hie geschehen!
Daz ein maget ein kint gebar
hêre über aller engel schar,
was daz niht ein wunder gar?
Hie liez er sich reine toufen,
daz der mensche reine sî.
Dô liez er sich hie verkoufen,
daz wir eigen wurden frî.
Anders waeren wir verlorn.
Wol dir, sper kriuz unde dorn!
Wê dir, heiden! Deist dir zorn
