Das Palästinalied şarkı sözleri

Allerêrst lebe ich mir werde, sît mîn sündic ouge siht daz reine lant und ouch die erde den man sô vil êren giht. mirst geschehen des ich ie bat, ich bin komen an die stat dâ got mennischlîchen trat. Schœniu lant rîch unde hêre, swaz ich der noch hân gesehen, sô bist duz ir aller êre. waz ist wunders hie geschehen! daz ein magt ein kint gebar hêrre übr aller engel schar, was daz niht ein wunder gar? Hie liez er sich reine toufen, daz der mensche reine si; do liez er sich herre verkoufen, daz wir eigen wurden fri. Anders wæren wir verlorn; wol dir, sper, kriuz unde dorn! We dir, heiden, deist dir zorn! In diz lant hât er gesprochen einen angeslîchen tac, dâ diu witwe wirt gerochen und der weise klagen mac und der arme den gewalt der dâ wirt an ime gestalt. wol im dort,der hie vergalt! Kristen, juden unde heiden jehent daz diz ir erbe si. Got sol uns ze rehte bescheiden durch die sine namen dri. Al diu welt diu stritet her: wir sin an der rehten ger, reht ist daz er uns gewer.